पाकिस्तानमा जेलबाट २०० भन्दा बढी कैदी फरार

पाकिस्तानको विशाल तटीय शहर कराँचीस्थित एक जेलबाट भूकम्पका क्रमिक धक्का आएपछि २०० भन्दा बढी कैदी फरार भएका छन् ।

कुल २१६ जना फरार कैदीमध्ये करिब ८७ जनालाई पक्राउ गरिएको र बाँकी अझै फरार रहेको सिन्ध प्रान्तका सूचना मन्त्री शर्जील इनाम मेमनले जनाएका छन् ।

जेलबाट भाग्ने क्रममा एक कैदीको मृत्यु भएको छ भने १२ जना घाइते भएका छन्, जसमा केही सुरक्षाकर्मीसमेत छन् । घटना स्थानीय समयअनुसार मंगलबार (३ जुन) बिहान करिब १ः३० बजे भएको हो ।

भूकम्पको कारण कैदीहरूमा त्रास फैलिएको मेमनको भनाइ छ । घटनापछि प्रान्तीय सरकारको जेलसेवा प्रमुखलाई पदबाट हटाइएको उनले जानकारी दिएका छन् ।

पाकिस्तानका जेलहरू प्रायः भीडभाड, खराब अवस्था, भ्रष्टाचार र मानवअधिकार उल्लङ्घनका कारण बदनाम छन् । साथै, न्यायिक प्रक्रिया ढिलो हुने भएकाले कैदीहरू लामो समयसम्म थुनामा बस्न बाध्य हुने गरेको बताइएको छ ।

सिन्ध मौसम विज्ञान कार्यालयका कार्यकारी प्रमुख आमिर हैदर लघारीले कराँचीमा पछिल्ला तीन दिनमा २० भन्दा बढी भूकम्पका धक्का मापन गरिएको जानकारी दिएका एएफपीले जनाएको छ ।